價錢：Agoda$342（連稅）/1晚
房型：豪華房
地址：尖沙咀加連威老道29A
最早入住時間：15:00
一般退房時間：12:00
登記：
-雙方出示身分證後，繳交$500按金便可入住。
瑞生尖沙咀Attitude、瑞生嘉威Soravit，兩間酒店位置都喺加連威老道， 隸屬同一個集團。因為今次係第一次黎，見到大廈名有「瑞生」兩個字就即刻衝咗入去，上到3樓服務台先知道原來行錯酒店⋯🙃
Attitude設計以香港作為主題，牆身以香港街景為主題，甚具本土特色。
今次book咗嘅Soravit就以泰國風格為主，設計好有泰式SPA feel，而且酒店仲放咗好多泰國藝術品擺設，亦有擺放幾尊泰國佛像喺入口同大堂等位置。
房間：
原本對間房抱有好大期望，點知一打開房門—
就已經係張床。🤣🤣
房間狹窄而且仲比預期中簡陋好多，但整體都算乾淨整齊。不過開完冷氣之後聞到風口位傳出陣噏味⋯於是將冷氣較到最大，落街食完野再上嚟陣味已經散得七七八八，所以影響都唔算好大～
由兩張單人床合併成一張大床，軟硬度適中、唔會過軟或過硬，印象中當晚好快就訓著咗。😛
間房最有趣嘅係⋯打開窗簾會見到酒店平台！😂 雖然玻璃門鎖住咗，同埋上面有寫「非客房範圍，請勿外出」。但如果夜媽媽見到出面有人行過，你都咪話唔驚⋯⋯
🔌床頭兩邊各有兩個插頭位充電，需自備插頭、沒有USB
✅設有水煲、杯，以及雪櫃
❌沒有樽裝水提供
浴室：
-已配備牙具、二合一沐浴露、即棄拖鞋
廁所普普通通無乜特別，但見到廁所板上面有啲藍藍地色、抹唔到嘅漬。同埋沖緊涼嗰時即使閂實玻璃門，啲水都係會濺濕出面地板，呢下真係拗爆頭。
✅水溫穩定，花灑水力一般
❌只提供兩條浴巾，無後備毛巾/抹手毛巾
❌企缸地板有少許刮腳
（5星為最高分，空白=不予置評）
乾淨度：⭐️⭐⭐️
房間實在太細，可以講係一眼睇哂，相信清潔起上嚟都無咁困難。除咗廁所板以外，眼見周圍都無乜特別污糟嘅地方，只係啲色調望落去感覺上會比較殘舊。
交通度：⭐️⭐️⭐️⭐
酒店位於加連威老道，附近人流多，同時而多食肆選擇。附近有The one、美麗華等等大型商場，無論係行街、睇戲，抑或食飯都一應俱全。
性價比：⭐️⭐️⭐️
價錢只不過$300鬆啲，我覺得以尖沙咀地段來講算幾抵玩。如果自問要求唔高，有時突然間心血來潮想爆房，或者平平地搵個地方hea吓，呢間都係一個唔錯嘅選擇。
整體：⭐️⭐️⭐️
其實Book之前已經知道酒店前身係hello kitty藏屍案嘅案發地點，資料顯示大廈已於2012年拆卸，並且喺2016年改建成瑞生嘉威酒店。
因為見酒店好似無傳出過鬧鬼傳聞，所以今次先膽粗粗去試住一晚，同時亦好感恩無遇上啲咩奇怪事～🙇🏻♀️🙏🏻
