價錢：Agoda$763（連稅）/2晚
房型：卓智客房(免費升級至特級尊貴客房)
地址：彌敦道378號
最早入住時間：15:00
一般退房時間：12:00
登記：
今年生日放孖day，無選擇klook既staycation plan，反而係住返彌敦酒店～
相比起海景、自助餐，我更想要一個附近可以揼骨、又近我食海底撈既地方！🥰
📌喺Agoda訂房時有remark到係生日入住，而且今次帶咗CBD浴球專程黎浸浴，所以希望酒店可以盡量安排浴缸房比我地。
所以當日Check-in時，職員話已經幫我地升級至尊貴房，有浴缸之餘仲可以延遲到四點先退房！🧖🏻♀️（btw,前台姐姐笑容真係好甜☺️）
📌發現最近兩次去前枱多咗幾位職員stand by，而且當去前枱遞ID card時就已經會有另一位職員負責派健康申報表同簡單講解（以前長期得一個staff），整個入住流程比以往更快。👍🏻
📌上文有提及到酒店無職員check住客人量體溫，一切全憑自律。但今次見到每當有人想直行直過時，staff都會先截停客人並要求量體溫。
房間：
今間房型我地之前都有住過，所以並無太大驚喜，房間衛生狀況仍然一如既往的出色。👍🏻
✅夠闊落、有較大空間走動。
✅ 今次由於工作關係要帶埋Mac book黎開工，所以窗邊擺放長枱、隔離再併梳化既設計就啱哂我心水！
喺樓下Starbucks買杯咖啡，邊飲邊嘆住黎做野～間中又可以偷望下電視⋯ 🤪
⚡️同埋長枱上方額外有多兩個插頭位，可多部電子產品同時充電，唔洗行黎行去。
✅有提供即沖咖啡以及茶包，兩隻杯都無塵無漬，望落去好乾淨。
❌無樽裝水提供
浴室：
✅已配備牙具、浴帽、梳、洗髮水、沐浴露、護髮素、即棄拖鞋，另外有提供衛生袋放置貼身衣物。
✅透過玻璃窗可以望出房間，而且浴缸後方有全身鏡，萬一浸浴浸到㷫烚烚時可以直接望住鏡出火⋯⋯🤫
❌原本水龍頭下方有個掣可以控制去水位開關，但似乎咁啱壞咗，所以酒店另外提供一個浴缸塞比我地。
📌由於我地兩日都無叫人執房（因為慣咗自己執），第二晚call去前枱想補充返日用品。當時已經凌晨一點，但收線唔夠兩分鐘已經有清潔姐姐拍門，然後遞咗一大包日用品俾我，有三枝護髮素、四枝沖涼液、兩套牙刷⋯⋯但其實我地只有兩個人😂
當然到check out時我地都有將剩餘物資整齊放好，從呢件事當中亦覺得佢地處理任何問題都好快捷。👍🏻👍🏻👍🏻
（5星為最高分，空白=不予置評）
乾淨度：⭐️⭐️⭐️⭐️
今次入住為post website所以影咗好多相，其實走廊上既黃色地氈望落一撻撻咁，都真係幾核突⋯⋯感覺好似濕咗有水漬咁，但其實可能係原本花紋？？？？？
❌入住任何樓層都會喺走廊聞到煙味，雖然味道尚算可以接受（加上我係煙民，對我影響不大），但我知道對於唔食煙嘅住客黎講絕對係一種煎熬。（房間反而無煙味）
交通度：⭐️⭐️⭐️⭐️⭐️
🍲佐敦一帶有咩好野食相信都唔洗我介紹啦！🤤
性價比：⭐️⭐️⭐️⭐️⭐️
位置、服務、房型，完全無可挑剔！
性價比首選🥇
整體：⭐️⭐️⭐️⭐️⭐️
生日都要住返黎間，知佢咩料啦！😆
