價錢：Agoda$387（連稅）/1晚
房型：頂級房
地址：旺角通菜街123號
最早入住時間：14:00
一般退房時間：12:00
登記：
-雙方出示身分證後，繳交$500按金便可入住。
一開始係安排咗6樓房間俾我哋，但一出lift門就已經聞到好大陣味⋯（類似嘔吐物味）而且望落仲比其他樓層暗，感覺好唔自在。
打開房門就見到地下有幾灘水漬，房入面濕氣好重，都係有一陣怪味，但就搵唔到源頭。
Anyway無再深究落去，即刻打電話去前台要求換房，之後就轉咗較高樓層嘅房比我地。
房間：
未打開門已經聞到好濃郁嘅漂白水+酒精味，即刻個心定返啲～
雖然出面仲落緊大雨，但成間房好光猛，環境無6樓咁陰沉同重濕氣，簡直係兩個世界！😂
因為係用兩張單人床拍成一張大床，所以床與床之間嘅凹位會頂住背脊，兩個人要集中瞓埋一邊先唔會「落坑」。
✅設有水煲&茶包
✅床頭有總燈掣可一次過熄燈
❌沒有雪櫃、不提供樽裝水
❌床頭有USB位充電，但就鬆到插唔實，同埋個掣位係下陷咗，完全通唔到電⋯即係有都等於無。😅
❌只得電視機下方有插頭位，唔單止要輪流充電，吹頭都照唔到鏡⋯
浴室：
-已配備牙具、沐浴露、洗頭水、即棄拖鞋
浴室同廁所分開咗兩邊，雖然地方好細，但至少大家唔洗爭廁所，你沖涼唔會阻住佢痾屎、佢痾屎又唔會阻住你刷牙～🤣
❌花灑啲水時斷時續，簡直係煎熬😢
❌即棄拖鞋質地似紙皮，著一陣個邊位已經開始裂
（5星為最高分，空白=不予置評）
乾淨度：⭐️⭐️
見到第一間房時感覺已經好差，當時覺得係職員唔小心比錯咗未清潔過嘅房我哋，但後來再諗深一層⋯床又鋪得咁整齊、日用品又fill好哂，咁無理由係未執過㗎？！
但就係唔知點解間房會咁臭，同埋有條毛巾攤開咗⋯⋯🤔
交通度：⭐️⭐️⭐⭐⭐️
位置方便夠哂開揚！鄰近旺角地鐵站B2出口，只需直行轉左就到達酒店，一分鐘都唔洗～
樓下有間囍運餐廳，營業時間去到夜晚12點，想食宵夜都好方便！（特別推薦炒飯、豬扒辛辣麵，真係大份又好食、經濟又實惠！🤤👍🏻）
性價比：⭐️⭐
早三個月前有去過兩次Sober hotel，房型都係一樣，但當時只需$290/晚。今次不但book貴咗，房間嘅整潔度亦都不如以往～
若清潔方面能夠改善加強，$400一晚都算係合理範圍內。
整體：⭐️⭐️⭐
因為床同窗嘅距離好近，所以可以好清楚咁聽到出面雨聲，聽住落雨聲瞓覺真係好舒服⋯🥺
下次如果再打風或黑雨，都會考慮book呢間，希望清潔方面會有所改善吧。
Comments