價錢：Agoda$416（連稅）/1晚
房型：高級房
地址：尖沙咀漆咸道61-65號
最早入住時間：14:00
一般退房時間：11:00
登記：
-需雙方出示身分證、填寫健康申報表後，再繳交$500按金便可入住。
尋日打8號風球提早收工，梗係即刻book返晚酒店住喇！喺尖沙咀地鐵站沿路行去酒店，見到街上面明顯比平時少人，因為個個都趕住收工返屋企～🤣
入住先知原來酒店原定要11點check out，但經詢問後，職員表示可以延遲到12 點鐘先check out！☺️ 感激感激🙇🏻♀️🙏🏻
房間：
一入到房聞到好大陣空氣清新劑嘅香氣！
房間硬件配套齊全，有辦公室又有吧枱可以坐，但擺得好慳位，房間依然空間感大，唔會有壓迫感。
但床褥就偏硬身，感覺上比較實在、無乜彈性，如果平時瞓開軟床可能會有少少唔慣～
🔌可用插頭或USB充電
✅設有水煲&茶包、雪櫃，以及消毒殺菌劑
✅提供兩支樽裝水
✅床頭有總掣可以一次過熄哂所有房燈，夜晚唔洗逐盞燈熄好方便👍🏻
浴室：
-已配備牙具、沐浴露、洗頭水、護髮素、剃鬚用品、即棄拖鞋
今次因為揀咗大房所以無浴缸浸～🥺 部分牆身嘅設計係淺木色，好有日本民宿feel！
✅花灑水流比較弱，開熱水大概等1分鐘先開始變暖，但勝在水溫夠穩定唔會時冷時熱。
✅鏡面有燈掣，可以開LED燈
❌廁所空間較窄，坐緊廁板再開門會頂到隻腳。
❌沐浴用品全部都係即棄式，但樽身好硬，好難吱到出黎。
（5星為最高分，空白=不予置評）
乾淨度：⭐️⭐️⭐️⭐
整體算乾淨，但美中不足係去廁所時見到廁板坐位有兩條勁長嘅頭髮⋯究竟係無清潔？定係清潔時唔小心甩頭髮就不得而知了。
所以都係自己過水，抹咗兩次先夠膽坐。😅
交通度：⭐️⭐️⭐⭐⭐️
尖沙咀B2金馬倫道出，一直行到街尾就會見到酒店後門，位置開揚、樓下有日本料理、燒肉放題、打邊爐、狗仔粉，或普通茶記等等，應有盡有。
就算尋日打8號波都照常營業，只能慨嘆生意難做啊！
性價比：⭐️⭐️⭐⭐
仲諗住打風房價會貴少少，但點知都係同平時差唔多，$400鬆啲就可以預訂到高級房～
其實喺Klook都見到百樂酒店成日出平價staycation plan，好多時包食包住$1000都唔洗，建議大家上klook會更抵。
或者follow酒店ig，佢地都更新得好密，可以第一時間知道最新優惠！
整體：⭐️⭐️⭐⭐⭐
百樂酒店一向風評不錯，職員態度友善、房間整齊乾淨，絕對值得光顧。👍🏻
Comments